Mat 28 | MED | STEP | Mowi kor mormin ui ni, pora nilinga, mᵾkᵾlmᵾ kor ou ei kᵾn, rangᵾmba pilpa, ⱡant gu nilinga, amp Mariya Makndelin kᵾn, amp Mariya ti ni kᵾn, Jisas nga on ei, on etᵾng kona nila, kunᵾnggil pilkᵾⱡ purᵾnggil.

Matthew 28

Jisas Ⱡoporpa Oⱡa Murum

1 Mowi kor mormin ui ni, pora nilinga, mᵾkᵾlmᵾ kor ou ei kᵾn, rangᵾmba pilpa, ⱡant gu nilinga, amp Mariya Makndelin kᵾn, amp Mariya ti ni kᵾn, Jisas nga on ei, on etᵾng kona nila, kunᵾnggil pilkᵾⱡ purᵾnggil. 2 Ei kᵾn, tᵾngᵾnda mint, kona ni kilimbᵾmp mam ti elinga, oⱡa muⱡ ila, Got nga Anggelo ti mana urum. Wote, ku mam ti, Jisas tetᵾng on kona ei, kumba angᵾndᵾk pendᵾtᵾng ni, mberᵾk ndupa mundpa, elim pol nila murum. 3 Elim nga kᵾng ei, kona kiraipa na ei mel, rᵾⱡang mba eng nurum. Wote, elim nga muⱡ mbal rᵾrᵾm mel mbᵾ, kona kup mong mel kurᵾmᵾⱡa itim. 4 El nde wu ila, rᵾp etᵾk morung ni kᵾⱡ, uⱡ ei kandᵾk, en enim nga min mbᵾ raka nilinga, min ngᵾn mundᵾk, wamp kormin ei mel kapⱡa puk petᵾng.

5 Ei kᵾn, anggelo ni ndi, amp ni raⱡ, kundpa nimba mel, “Enmbil mundmong iti nᵾtᵾl! Enmbil wu Jisas, nde peta ila rong wu ni, kurᵾk onmbil ei, na pᵾnt. 6 Wu ni, ya on kona ila pi napᵾtᵾm. Elim unt kont moⱡpa, nitim ni mel, elim ni ⱡoporpa omba pum. Ya okᵾⱡ on kona koⱡ ei, kunᵾnggil wᵾl! 7 Akup tᵾkrᵾk pukᵾⱡ, elim nga kitip kᵾni wu nimbᵾ kundkᵾⱡ, ‘Jisas koⱡum ni, wote ⱡoporpa omba pum. Akup wi Galili mba pilpa, kuimp tepa pum. Wote, enim ila puk, Jisas elim kᵾning!’ Enmbil kundᵾp nᵾnt ik kᵾⱡ, pilkᵾⱡ pᵾl!” nitim. 8 Ei kᵾn ku, mundmong etkᵾⱡ, wote numan mam ti elinga, wu on ei, tetᵾng kona ni wak rokᵾⱡ, elim nga kitip kᵾni wu ni kᵾⱡ kondᵾk, ninggil pilkᵾⱡ pukᵾⱡ nᵾkᵾⱡ purᵾnggil.

9 Ei kᵾn mint, Jisas ni, elim yant omba, amp ni raⱡ kandpa nimba mel, “Enmbil numan wang ndᵾl!” nitim. Ni kᵾn, amp ni raⱡ ndi, rᵾk pukᵾⱡ, Jisas nga kᵾmp raⱡ ambulk, rumaⱡi pekᵾⱡ, Jisas nga mbi paka rondrᵾnggil. 10 Jisas ndi nimba mel, “Enmbil mundmong iti nᵾtᵾl! Na nga wu ᵾngᵾnᵾl kᵾⱡ, pukᵾⱡ kundkᵾⱡ nanggila, wi Galili puk ila, na ok kᵾning nᵾl!” nitim.

El Nde Wu Nimbᵾ Ndi, Uⱡ Itim Nimbᵾ, Pris Kuimbal Ei Kundᵾk Nᵾtᵾng

11 Amp ni raⱡ puⱡᵾnggila mel, el nde wu ila morung ni kᵾⱡ ndi, int puk kona peng nila, wu pris kuimbal nimbᵾ, uⱡ itim kandrung nimbᵾ mel, kundᵾk nᵾtᵾng. 12 Wu pris kuimbal nimbᵾ kᵾn, manga wingti rᵾp wu nimbᵾ kᵾn, ol tek, ku moni minal kum rok, el nde wu nimbᵾ nguk, nᵾk mel, “Enim ndi, wamp mbᵾ kundᵾk nᵾk mel, ‘Tᵾn ur pimᵾn ndi kᵾn, elim nga kitip kᵾni wu kᵾⱡ ndi, rumbuldi ok, wu on ei kundᵾp nok, tᵾk mek pung nᵾi!’ nᵾtᵾng. 14 Wote, wu Pailot ei ndi, ik ei pilim ndam, tᵾn ndi, enim mong ti nᵾteing nimbun ik mat, tᵾp rapundpᵾn nindmin,” nᵾtᵾng. 15 Wote, el nde wu ni kᵾⱡ ndi, ku moni ni kᵾⱡ tᵾk, wu pris kuimbal ei ndi, ik nᵾi nitim ik ni mel nᵾtᵾng. Ei kᵾn, ik timan kep nok, rorung ni, Jura wamp mbᵾ kᵾn, nᵾk mek int yant etᵾng ei mel, akup ik kep norung timan ei ku, tepa yant yant orum.

Jisas Nga Ik Nimba Ʉi Rurum

16 Wote, kitip kᵾni wu 11 ni kᵾⱡ, Jisas ndi, wi Galili komnga ila pᵾi nitim ni mel purung. 17 Wote, Jisas ni oⱡnga kandᵾk, Jisas nga mbi paka rondrᵾng. Wote, wu mat ndi, Jisas wu waⱡᵾm ei nda nᵾk, ᵾk puk tᵾtᵾng. 18 Jisas ndi, wu ni kᵾⱡ morung ila, nondpa omba, kundpa nimba mel, “Muⱡ mᵾi raⱡ nga mel tetᵾm mbᵾ na ndi, rᵾp iteimp nimba, Got ndi, na ronduⱡ ei, na ngurum. 19 Ei kᵾn, akup enim ndi, puk muⱡ uⱡ kona mbila, wamp mormin mbᵾ, etᵾk tᵾk, na nga kitip kᵾni wamp rundᵾi! Wuta kᵾn, kangᵾm kᵾn, Muⱡnga Wingti kᵾn, mbi tek angᵾndᵾk, wamp mbᵾ nu tindᵾi! 20 Wote na ndi, enim man ngur ik nimbᵾ mek puk, wamp mbᵾ mbo indangina, pilik teing. Ei kᵾn, na enim kᵾn pᵾla kana ui moⱡᵾng mbila, kunda moⱡᵾp mint pamba mba, muⱡ mᵾi raⱡ pora nimba,” nitim.